211. De sancto Francisco.

la. Coeli cives in colono,
Totus orbis in patrono
Christo promat dulci sono
Laudes et tripudia;

1b. Gratulentur et minores
In Francisco, cujus mores
Aegros sanant et languores
Carnis pellens vitia.

2 a. Super Christum stans innixus,
In confixo manens fixus,
Crucifixum crucifixus,
Nudus nudum sequitur;

2 b. Flagrat corpus ex amore,
Rubet latus ex cruore,
Pes cum manu novo more
Carnis arte pingitur.

3 a. Paupertatis in camino
Praeelectus partu trino
Secum locat in divino
Throno multa milia.

3 b. Praecursoris in secretum
Signum gerens per desertum,
Mundum clamat in apertum:
Fiat poenitentia.

4a. Gestis verba confirmantur
Atque signis, nam curantur
Aegri morbi, suscitantur
Defunctorum funera ;

4 b. Fidem aemulans Romanam,
Gentem adiit paganam,
Horum sectam culpans vanam,
Plagam atque scelera.

5 a. Spe fraudata percussoris
Ac invitus laxis loris
Ipse intus, Christus foris
Speculator adfuit.

5 b. Hinc electam curans gentem
Gressus opemque ferentem,
Grex supernis non carentem
Parem thori voluit.

6 a. O Francisce, dux virtutum,
Gregem parvum te secutum
Serva praebens iter tutum
Ad coeli palatia;

61). Ut pastorem te sequentes,

Iter rectum diligentes,

Exsultemus te videntes

In coelesti curia.