79. De beata Maria V.

(Infra Nativ. et Purific.)

la. Omnis ager scripturarum
Tui ventris germen clarum,
Virgo mater, redolet)

1b. Omne semen aerumnarum,
Quidquid Eva dat amarum,
Ille fructus abolet.

2 a. Anus Sara dum fetatur,
Domus Abrae collaetatur
Matri diu sterili:

2a. Aula coeli jucundatur,
Quia salus ex te datur
Mundo diu flebili.

3 a. O Maria, mater Christi,
Rubus ille tu fuisti,
Ignis quem non nocuit;

3 b. Ignem verbi tu gessisti,
Corruptelam nec sensisti,
Sic nos fides docuit.

4 a. Manna coelo pluit verum,
Quando venit auctor rerum
Virginis in uterum:

4b. Qui cruoris sui merum
Vitis vera dans sincerum
Mutat ritus veterum.

5 a. Arens virga germinavit,
Virgo feta terminavit
Culpam primae feminae ;

5 b. Pater verbum seminavit,
Caro verbum generavit
Sine viri semine.

6 a. Rore vellus inundatum
Signat pneuma tibi datum
Multiformis gratiae;

6 b. Arvum circa desiccatum
Dat Judaeum jam privatum
Conditoris facie.

7 a. Deus pater hoc juravit,
Quod de fructu ventris David
Regni thronum sedeat;

7 b. Vere fractus ventris David ,
Princeps pacis jam regnavit,
Nunc captivus redeat.

8 a. Illud tuum mundum pectus,
Quo quievit Deus tectus
Humano sub corpore,

8 b. Salomonis erat lectus,
Viris bonis circumspectus
Nocturno sub tempore.

9 a. Ecce constat jam completum
Isaiae magni laetum
Illud vaticinium:

9 b. Virgo praegnans dedit fetum,
Quo fugavit mortis metum
Hostis et dominium.

10 a. Porta clausa te signavit,
Per quam solus rex intravit
Serato signaculo ;

10 b. Hoc et lapis praemonstravit,.
Quo nil homo laboravit,
Abscissus miraculo.

11a. Virgo, templum deitatis,
Plena summae pietatis,
Nos indignos respice

11b. Quo redundas praesta gratis,
Ut in tuae claritatis
Sorte simus, effice.