244. In Nativitate s. Johannis B.

1. Adest dies recolenda,
Dulci melo prosequenda,
Dulci digna carmine:

2 a. Lux est Ista, quam baptista
Ornat natus, Immo datus
Novo patris ordine.

2 b. Ante sanctus, quam nascatur,
Quis Johannes habeatur
Suo signans nomine.

3 a. Nam lux luce de paterna
Praedicatur ac lucerna
Subsequente gratia.

3 b. Zacharias rogat attentius,
Cum fidelis revelat nuntius,
Divina mysteria.

4 a. Orat vates et moratur,
Moram vatis admiratur
Foris adstans populus:

4b. Vatis Inquam dubii,
Qui de tanti filii
Ortu fit Incredulus.

5 a. Stupor transit In Immensum,
Dum sacerdos post Incensum
Vocis carens modulo

5 b. Ab altari mutus redit
Et pro voce signum dedit
Exspectanti populo.

6 a. Sed electus et dilectus
Puer Iste tua, Christe,
Declarat magnalia,

6 b. Relaxatur ut loquatur
Lingua patris atque matris
Delentur opprobria.

7 a. Iste puer Zachariae
Juxta carmen Isaiae
Vox clamantis dicitur,

7 b. Ut paretur via recta,

Quam sectetur plebs perfecta,
Ante verbum mittitur.

8 a. Antra petit vir beatus,
Cibi fuit apparatus
Sub aetate tenera

8b. Mel locustis sociatum,
Aqua siti munus gratum,
Vestis quidem aspera.

9 a. Nullus major hoc Johanne
Magnus hic qui et In amne
Tinxit coeli Dominum;

9 b. De quo scimus manifeste,
Quod praecellit Deo teste
Natos Inter hominum.

10 a. Hic Messias vel Elias
Ne credatur, se testatur
Messiam praecedere:

10 b. Concurrentes ad se gentes
Illi parat, quem declarat
Se minuto crescere.

11a. Iste martyr et athleta,

Plus exsistens quam propheta,
Protestatur adimpleta
Prophetarum famina:

11b. Quod velabant res promissae,
Totum monstrat patuisse
Sed et regnum advenisse
Ad tollendum crimina.

12 a. Per praeconem novi regis
Terminatur jugum legis
Et ad votum novi gregis
Nova patet gratia.

12b. Ergo puer nati Dei,
Fac ut gentes et Judaei
Unum fiant atque rei
Subleventur venia.

13 a. Tuam laudem prosequentes
Et In ea permanentes
Fac erutos vetustate
Nova frui libertate
Et privari macula.

13b. Quos In mundo scis gravari
Fac mundana non sectari,
Ut In luce singulari
Tecum possint gratulari
Per aeterna saecula.