360. De sancta Ursula.

la. Gaude, Sion filia,
Spirans ad martyria
Contemplatione,

1b. Pulso carnis nubilo
Mentis plaude jubilo
Virginum coronae.

2 a. Quae victrices palmas ferunt
Stolis tectae, quas laverunt
Agni Dei sanguine,

2 b. Auro, gemmis perornatae
Rosas carpunt laureatae
Virginis cum virgine.

3 a. Velut cedri vernant flore,
Quas perfundens Deus rore
Complantavit In tenore,
Ut sint nidus passeri ;

3 b. Secus aquas scripturarum
Cum novellis olivarum,
Lumen stillant animarum,
Ut respirent miseri.

4 a. En In choro angelorum
Nuptialem sternunt thorum
Et In horto gaudiorum
Commetunt aromata ;

4 b. In convalle pietatis
Nardus fraglat caritatis
Et flos candet castitatis,
Virtutum charismata.

5 a. Inter tanta floscula
Prima floret Ursula,
Gerasina, Sicula,
Ducta a Britannis

5b. Quarum ad consilia
Sunt undena milia,
Ut rosae vel lilia
Fraglant Alemannis.

6 a. Quidam testes sunt earum
Et consortes gratiarum
Praesules et milites,

6 b. Ad vindictam nationum
Signo ferunt passionum
Gladios ancipites.

7 a. Quae dum Roma redeunt,
In Agrippa subeunt
Gladios Hunnorum,

7 b. Spreta mundi gloria
Mutant transitoria
Sub spe futurorum.

8 a. Bethsaidae sunt piscina,
Quae fit aegris medicina
Ad virtutis bravium,

8 b. Boni pisces In sagena,

Quibus Christus est In coena
Salutis cibarium.

9 a. Ergo patres et puellae,
Jam divino pastae melle,
Nos purgate omni felle
Vestrae precis gratia,

9 b. Ut tentati non vincamur,
Laude vestra fulciamur,
Sed laetari mereamur
Sempiterna gloria.