COLLOQUIUM X.

Ad magnum ecclesiae profectum varias in ea florere religiones.

Obviam se habuere in urbe vir Dei et beatus pater noster Dominicus praedicatorum patriarcha et fundator inclytus. Quibus seria quaedam ad animarum salutem et plurima ad ecclesiae catholicae emolumentum et pacem secum proponentibus et disponentibus, ait praedicatorum magnus ille decor ad socium et amicum suum Franciscum: Frater charissime, propter magnam meam tecum necessitudinem, praecordialem erga filios tuos amorem et pacis fraternitatisque inter tuos et meos stabilitatem utrosque gauderem sub una religione militare, ut, quos patrum firmus amor ita conjunxit, religionis aut vitae disparitas non dissolvat. Cui summa humilitate Franciscus: ,, Divinae est voluntatis, amantissime frater, quod factum est, ab eaque ordinatum est diversas a nobis fundari religiones, ut in utriusque varietate, praeceptorum diversitate, illorum rigore et horum lenitate varietati subveniatur humanae infirmitatis et quibus haec non placent, illa non displiceant, quibus una dura videtur, altera lenior appareat, et sic non unius religionis angustiis Deus animas perdat, sed alterius capacitate lucretur. "