COLLOQUIUM IX.

Regulam minorum non a b. Francisco compositam, sed a Deo desuper esse concessam.

Honorio tertio summo pontifici, qui regulam minorum octavo sui pontificatus anno sub bulla confirmavit, aliqua ejusdem instituti praecepta dura nimis et humanae infirmitati graviora visa sunt. Beatum ergo patrem hortatus est, ut quaedam mitigaret, quaedam mutaret, alia vero omnino tolleret. Cui beatus legislator: "Ego, beatissime pater, praecepta aut verba illa in regula non posui, sed Christus, qui omnia utilia et necessaria saluti animarum ac fratrum et bono statui et conservationi religionis melius omnibus novit, cuique omnia, quae ventura sunt in ecclesia et religione nostra, praesentia sunt et patent. Non ergo debeo nec possum Christi verba mutare aut omnino abolere. "