COLLOQUIUM XVIII.

Spiritui sancto eum mentiri, qui ad religionem sinistra intentione accedit.

E civitate Lucana juvenis quidam, parentum illustri prosapia clarus, sed nimia levitate et inconstantia obscurus, ad lacrymas, quam ad devotionem, promptior humanis quibusdam causis condescendens, non Dei spiritu agitatus ad fratres accessit seque illorum catalogo adscribi maximopere velle significavit. Quem ut ad b. Patrem adduxerunt, multis profusis lacrimis et ficto cum fervore ad suum admitti consortium humiliter denuo rogavit. Qui externae fictionis conscius et internae tepiditatis non ignarus commoto vultu et verbis increpatoriis ait: "Miser atque carnalis, cur Spiritui sancto mentiris et me fallere cupis? Carnaliter plangis, et spiritus tuus cum Deo non est. Vade, ad carnales revertere, spiritualibus non es dignus, quoniam nihil spiritualiter sapis. "