33. In festo Paschae.

1. Arva splendent coelestia,
Elegit Dominus
nova bella.

2 a. Audet miscere proelia
Draco cum Messia,
Vincitur morte scelus,
Surge, sepulte meus,
Mea vita.

2b. Mors mortis, pulchre moreris,
Mundi nefas tollis,
Jesu coeleste decus,
Rex et pontifex meus,
Salus mea.

3 a. Dum obis,

lumen verissimum orbis,
plangit virgo theotocos,
plangit virgo theologos,
tuas, o munde,
noxas, vulnera.

3 b. Dum mortem

perimis, hostia patris,
tellus tremit, sol nigrescit,
pavet umbras centurio,
chaos antiquum,
mundus trepidat.

4 a. Vincla, carcer, verbera,
Spineum diadema,
Alapae, bksphemiae,
Sputa, crux, clavi, acetum,
Fel, lancea necant ipsum
Sathan.

4b. Velum templi scinditur,
Saxa dura finduntur,
Monumenta panduntur,
Multi sancti suscitantur,
Victorem laudant in urbe
sacra.

5 a. Stupuerunt inferi

Jubar adventus Christi,
Sed exsultarunt agmina
Animarum

in orco clausa:

5 b. O lux Abrahamides,
Hebraeorum prisca spes,
Quanta tenuit te mora,
Tandem solve
tuorum vincla.

6a. Nonne tu percussisti
hostem superbum,
triumphasti draconem magnum,
libertas publica?

6 b. Invenit, pastor bone,
te Magdalena,

cum apostolis nos, dux bone,
duc in Galileam.

7 a. Da nobis felicem
propitiationem
in finem,
propitiatio nostra.

7 b. Da membris post mortem
fessis et animabus
requiem,
requietio nostra:

8 a. Et regni gloriam

videre, ubi cum palma
coelestis
Hierusalem in aula

8b. Tui tecum festo

perenni milites regnant,

fave, rex

gloriae, et exaltetur,

9. Domine, semper
victrix dextera tua.