37. In Ascensione Domini.

1. Adest dies celebris,

Coelum Christo petitur,
Sedens gens in tenebris

Redemptorem sequitur,
Caput nostrum dextera
Patris cinctum laurea
Supra cuncta sistitur.

2 a. Ecce, patri loquitur,
Populum, qui sequitur,
Fluor mei lateris
Solvit domo carceris,
Nobiscum associa,
Quos potenti gratia
Eduxi ab inferis.

2 b. Salve, unigenite,
Fateor, quod dedi te
In lumen gentilium,
Fert pater ad filium.
Istos libens capio,
Illis bonum cupio,
Quos tenet exsilium.

3 a. Omne, quod vis, facio,
Tam brevi in spatio
Tua sancta passio

Solvit omne saeculum;
Da locum ubilibet
Et manducet quilibet,

Quod parasti, ferculum.

3 b. Ego cum spiritibus
Exsultans fidelibus
Grates tibi refero

Praedilecto filio ;
Illusisti daemoni,
Subvenisti homini

Crucis beneficio.