56.

1. Ave regina coelorum,
Mater regis angelorum,
Sponsa Dei speciosa,
Spectabilis florum rosa.

2. Maria, virgo beata,
Summo parenti pergrata,
Ordinata ab aeterno,
Sola places Dei verbo.

3. Gratia divi spiritus
Obumbravit tuos sinus
Et alvum fecit fecundam,
Reddendo Intemeratam.

4. Plena misericordiae,
Sceleratis vas veniae,
Patrona tu orphanorum,
Conciliatrix hominum.

5. Dominus factor siderum
Castum beavit uterum,
In aetheris dum statuit,
Coelicolis te praetulit.

6. Tecum sedem fave, mater,
Quam nobis coelestis pater
Precibus condonet tuis
Exulibus Evae natis.

7. Benedicta sunt viscera,
Quibus paranymphi verba
Prolem almam Intulerunt,
Deum summum nuntiarunt.

8. Tu lapso levamen orbi,
per te vitiorum morbi
Et leviathan oppressus,
Dum ex te ortus est Christus.

9. In te vetus contagium
Protoplastique devium
Terminum cepit salubrem,
Dum salus prodit In lucem.

10. Mulieribus es dispar,
Splendor nympharum et jubar,
Ante te nulla similis
Nec sequens est visibilis,

11. Et tua vatum famina
Praedixerunt exordia,
Inquientes ex te nasci
Pacem generis humani.

12. Benedictus est uterus
Ab omni scelere salvus,
Fit thalamus magni Dei
In opitulamen rei.

13. Fructus dulcis mundo crevit,
Iter salutis Invenit
Ovis errans, sideream
Inducitur hierarchiam.

14.Ventris tui, virgo, natus
Nostros absolvat reatus,
Virtute firmans pectora,
Intrare juvet aethera.

15. Jesus Christus, almum verbum
Cum patre regnans In aevum
Pariter et sanctum flamen
Id nobis concedat. Amen.