12.

1. Ave virgo, mater Intemerata,
Paradisi lilium,
Genuisti filium
Inviolata.

Rore perfusum vellus Gedeonis
Te signavit, Maria,
In te lucet sophia,
Fons Salomonis.

Flos pudicitiae,
Fons omnis gratiae.

2. Ave templum divinae majestatis,
Florens Aaron virgula,
Radiosa stellula
Divinitatis.

Beatus venter tuus procreavit
Angelorum dominum,
Salvatorem omnium,
Quem mors expavit,

Et plenam gratia
Sine fallacia.

3. Maria, porta jugiter serrata,
Salutavit Gabriel,
Quam vidit Ezechiel,
Semper beata.

Dixit: Ave, te solam concupivit
Regum rex altissimus,
Fructus nam dulcissimus
Ex te prodivit.

Ut tuo filio
In summo solio

4, Cum sanctis conregnare mereamur,
In coelesti acie
Deitatis faciem
Intueamur,

O virgo sacra atque veneranda,
Praesta hoc quod petimus,
Nam te unigenitus
Mire exaudit,

Cujus In dextera
Gaudes cum gloria.