184.

1. Aetas orbi venit aurea,
Jubar clarum nituit,
Procul fugans moestissima
Noctis umbracula,
Quo venusta prorupit
Lampas phoebea.

2. Alma patrum prisca vetustas
Taetris clausa sedibus,
Quam pati vexat gravitas
Leges tartareas,
Nunc soluta domos
Colit aethereas.

3. Admirabile commercium!
Conditor summus rerum,
Ens, athanatos, entium
Finis, Initium,
Corpus alvo nymphae
Sumit animatum.

4. Firmo Gabrielis nuntio,
Ab alto venientis,
Concilio deifico
Pudico thalamo
Virginalem ventrem
Gravidat filio.

5. Diva, Inquit, ave Maria,
Coetibus femineis
Antistes sincerissima
Et plena gratia,
Domini est tecum
Alma praesentia.

6. Verba nympham turbant angeli,
Se fecundam miratur
Ac nescia thori absque
Semine virili,
Sileat hic lege
Physicus exili.

7. Umbrat virtus divi flaminis
Pectus pudicissimum,
Sacratae virginis refertum
Rore numinis,
Unde recens oritur
Salus hominis.

8. Matri pariter et filio
Dignas promamus laudes,
Ut quae nos ab exilio
Candenti lilio
Mundi liberatos
Fert coeli bravio.