98. De beata Maria V.

la. O beata beatorum

Angelorum domina,
O devote devotarum
Laudanda per carmina.

1b. O Maria, mater pia,
Dita nos virtutibus,
Ut frequenter te decenter
Veneremur laudibus.

2 a. Fide voto, corde toto,
Te precamur pariter,
Ut invicti a delicti
Labe simus jugiter.

2 b. Carcerati Evae nati
Durae ure vincula
Igne divo, agni rivo
Lava prava singula.

3 a. Nobis datum ex te natum
Placa verbo filium,
Ne ruamus, ne perdamus
Beatorum praemium.

3b. Sed cum mundi gemebundi
Desinit exsilium,
Eruamur, nanciscamur
Sanctorum consortia.

4 a. Fac nos omnes cohaeredes
Christo in coelestibus,
Apud ipsum sint mercedes
Tibi servientibus.

4 b. Rege nos, ut transeamus
Mundi transitoria,
Ut perenni valeamus
Tecum frui gloria.