310. De sancto Nicasio.

la. Martyris eximii,
Praesulis Nicasii
Pangatur victoria,

1b. Qui pro Christi nomine
Vicit In certamine,
Coronatur gloria.

2 a. Hic Remorum pontifex,
Sanctitatis opifex,
Victor re et nomine,

2b. Vandalorum aciem,
Paganorum rabiem
Sedat fuso sanguine.

3 a. Nam Dei judicio
Flammis atque gladio
Pessumdatur Gallia,

3b. Et vastatur regio,
Barbarorum legio
Remis petit moenia.

4a. Martyr Dei gentibus
Occurrit furentibus
Cum germana obviam,

4 b. Pro salute patriae
Majestatis gloriae

Sponte se dat hostiam.

5 a. Ferit hostis gladio,
Quem coelestis ultio
Poena punit Impia;

5 b. Lingua caeso capite
Versum complet, milite
Potito victoria.

6 a. Vindex Eutropia,
Fratris palmae socia,
Plena Deo femina,

6 b. Non virtute propria
Sed Dei potentia
Rapit hostis lumina.

7 a. Dat patrem cum filio
Neci gentis legio

Gratam Deo victimam,

7 b. Virgo fuso sanguine.
Certato certamine
Coelo reddit animam.

8 a. Timent hostes, fugiunt,
Res urbis ejiciunt,
Victi petunt propria,

8 b. Cum commissis ovibus
Peremptis tortoribus
Victor vitae gaudia.

9. Cujus Christus precibus
Nos piatos sordibus
Suis addat civibus.