315. De sancto Ottone.

la. Gratulare, sponsa Christi,
Quae per fidem genuisti
Virum tanti nominis,

1b. In quo pater gloriatur
Et virtutes operatur,
Gaude, mater nobilis.

2 a. Vita cujus et doctrina
Quasi stella matutina
Lucet In perpetuum,

2 b. Per te flagrat haec lucerna
Praebens Iter ad superna,
Deus exercituum.

3 a. Non In vase nec sub lecto
Constituta, sed In tecto
Praesul sparsit radios,

3 b. Claritate rutilabat,
Veritate fulminabat
Terrens adversarium.

4 a. Pastoralis dono curae
Dispensator fit mensurae
Tritici benevolus,

4b. Sacri verbi rudimentis
Pollet Pommeranae gentis
Doctor et apostolus.

5 a. Auro fecit effulgere
Vasa templi, quae fuere
Vasa contumeliae,

5 b. Dum convertit ab errore
Pommeranos et squalore
Gentilis perfidiae.

6 a. Otto prudens et fidelis,
Dispensator qui In caelis
Certo gaudes titulo,

6b. Ubi fruens coelibatu
Nos absolvas a reatu
Mortis et periculo.

7 a. Tandem morte dissolutus
Mole carnis est exutus,
Sic In regnum constitutus,
Sic coronam assecutus
Gloriae feliciter.

7 b. Christe, fons dilectionis,
Qui probasti cor Ottonis,
Reple tuis tuos donis,
Repleamur ut In bonis
Domus tuae jugiter.