341. De sancto Stanislao.

la. Sit jucundus totus mundus
Voce votis sedulis,

1b. Coelum gaudet et collaudet
Festum tanti praesulis.

2 a. Jam In caelis ut fidelis
Coeli fretus epulis,

2 b. Qui Ignotis et aegrotis
Opem tulit populis.

3 a. Gentem multam et Incultam
Verbo vitae coluit,

3 b. Cujus regem contra legem
Facientem arguit.

4 a. Qui amaram juxta aram
Necem parans praesuli

4b. Hunc divisit, membra misit
Circumquaque projici.

5 a. Ossa tecta sunt collecta
Aquilarum studio,
Intimata luce data
Excelsorum radio.

5 b. Fulgent signa laude digna
Praeclaro prodigio,
Consolatur, qui gravatur
Ipsius suffragio.

6 a. Martyr Christi, qui fuisti
Pius pastor ovium,

6b. Nos Intende et defende
Ab Insultu hostium.

7 a. Stanislae mentis pravae
Procul pelle saniem,

7 b. Nos conducas, tecum ducas
Ad aeternam requiem.