352. De s. Thoma Cantuariensi

la. Plaude Cantuaria

Plausu renovato,
Laude multifaria

Deum collaudato,
Urbs sanctificata,
Firmiter fundata,
Deo consecrata,

Pretioso sanguine
Praesulis ornata

Et sancti solamine
Thomae solidata.

1b. Per mortem pontificis

Mors mortificatur,
Per occasum judicis

Jus redintegrato,
Mors mortem fugavit,
Fraus fidem firmavit,
Nox diem novavit;

Mira lucis novitas,
Quam nox reformavit,

Miranda vivacitas,
Quam mors ministravit.

2 a. Emicat ex tenebris

Lux, ex spinis rosa
Et ex fraudis latebris

Fides fructuosa,
Pastor Immolatur,
Fides roboratur,
Caecitas caecatur,

Congaudet ecclesia,
Cum pax reformatur,

Dolet Injustitia,
Cui jus dominatur.

2 b. Nova nostris vallibus

Vinea plantatur,
Per quam nobis omnibus

Salus restauratur.
Jam risus moerorem,
Requies laborem,
Gaudium dolorem,

Spes timorem superat,
Sanitas languorem,

Fraudi fides Imperat,
Fraenat pax furorem.

3 a. Vitium virtutibus

Solet dominari
Et a fraudis viribus

Fides conculcari;
Nunc ordo mutatur,
Fraus annihilatur,
Scelus exstirpatur,

Martyris subsidio
Feritas sedatur,

Derogatur vitio
Virtus dominatur.

3 b. Salve, lux laetitiae,

Lumen confessorum,
Thoma, sol ecclesiae,

Solamen Anglorum.
Tu justi juvamen,
Tu moestis solamen,
Tu lapsis levamen

Tu nostra memoria
Nostrum medicamen

Tibi laus et gloria,
Virtus, honor. Amen.