354. De s. Thoma Cantuariensi.

1 a. Paulo tuo gaude, Roma,
Et tu tuo plaude Thoma,
Felix Cantuaria,

1b. Pauli Thomas Imitator,
Praedo fuit et vastator
Pacis In ecclesia.

2 a. Hinc ex lupo lator legis,
Pastor pius et dux gregis,
Agnus innocentiae,

2b. Et athleta Christi fortis
Poena spreta dirae mortis
Mortem vicit hodie.

3 a. Thoma, martyr pretiose,
Fac nos mortis taediosae
Non timere taedia,

3 b. Tu post Paulum spes secunda,
Desperatis ut fecunda
Conferatur venia.

4a. Tibi lepra, scabra cedit,
Mutus fatur, orbo redit
Visus et virilia ;

4 b. Claudus salit, surdus audit,
Caecus videns tibi plaudit,
Tanta data gratia.

5 a. Per te membris destitutis
Priscae redit vis virtutis,
Cedunt quaeque vitia,

5 b. Si sit firma spes salutis,
Fracto jugo servitutis
Fugantur daemonia.

6a. Verbum complens hic divinum
Semetipsum vespertinum
Dedit sacrificium,

6 b. Quos praescivit et praedixit,
Dum pro Christo pie vixit
Missus In exsilium.

7 a. In talentis duplicatis
Flamma fervens caritatis
Laetus bibit calicem,

7 b. Et Idcirco cum beatis
Regno gaudet claritatis
Coeli super apicem.

8 a. Jesu bone, rex coelestis,
Cujus Thomas verus testis
Viva placet hostia,

8 b. Nos Illius patronatu
Liberatos a reatu
Transfer ad coelestia.