364. De sancto Vincentio.

1. Victori Deo

laudum praeconia

referat

gaudens ecclesia.

2 a. Cum dies celebris

annua

revehit mundo gaudia,

2 b. Sonoris vocibus

dulcia

concinat chorus cantica.

3 a. O quam recolenda

instant solemnia,

exsultat

nunc omnis ordo

mira laetitia.

3 b. Vivis lapidibus

aetheris edita

jungitur

gemma splendida

in poli regia.

4 a. O Vincenti,

sacri parta tibi

pretio sanguinis

donatur laurea.

4b. Cum sanctorum

choro spirituum

victor gloriaris

in stola rosea.

5 a. O quam digna geris

martyris Insignia,

praemia tui laboris,

poenis succedunt

aeterna gaudia.

5 b. Ad Illa milites

tendunt certamina

talibusque bellatores

ornant trophaeis

et tanta gloria.

6 a. O quanta supera

regis In curia

merces militantibus

datur post proelia.

6b. In Christo credula

sit mens Intrepida,

brevis quidem labor est,

dona perennia.

7 a. Fragilis materia,

pulveris haeres

et transitura,

ut vivas

Deo, moriaris,

sic scandens ad sublimia.

71). Martyris supplicia

si paulo tibi

videntur dura,

respice,

quid sit promereri

pro terrenis coelestia.

8 a. O Vincenti,

sancti spiritus

flamma, purgans

omnia

cordis intima,

devicit

ignis incendia.

8b. O divinae

dux militiae,

tibi phalanx

coelica

sistit obvia

jubilans

laude dulciflua.

9a. Fortis belligerator,

paradisi gaudia,

quaesumus,

nobis Implora,

quo gaudeamus

tecum per saecla.

9 b. Felix, felicitatis

aeternae praecipua

munera

tuis deposce,

regis aeterni

frui praesentia.

10. Ave, martyr

semper colende,

tibi sit laus

temporis ulla

sine meta.