375. De ss. Angelis.

la. In coelesti hierarchia
Praesentetur laude pia
Praesens jubilatio

1b. Jubilemus collaudantes,

Quos tam digne ministrantes
Decet collaudatio.

2 a. Ex Aegypto castitatis
Super orbem vanitatis
Scandit noster spiritus

2 b. Spiritales coeli vitas

Nunquam visas, nunquam sitas
Intueri coelitus.

3 a. In figura corporum
Sub mensura temporum
Non sunt hae naturae,

3 b. Sed sunt diva specula,
Plena sine macula
Formis creaturae.

4 a. Hi sunt novem angelorum
Ordines sub distinctorum
Hierarchia triplici ;

4b. Quot sint? tantum numerantur

Singuli, quo nominantur,

Verbo Dei simplici.

5 a. Una vita sunt fruentes,
Omnes tamen differentes
Naturali specie,

5 b. Quique minus elongantur,
Verbo magis perlustrantur
Claritate gloriae.

6 a. Felix haec diversitas,
Quae sic fit Identitas,
Quod non dividatur,

6b. Quia per officia
Quilibet et propria
Ordo distinguatur.

7 a. Seraphim sunt Incedentes,
Cherubim plene scientes,
Throni sedes judicis:

7 b. Hi dicuntur assidentes,
Cuncta regit persequentes
Summi lex artificis.

8 a. Sed disponunt dominatus
De ministris, principatus
Ministrando praesident,

8 b. Potestatibus arcentur
Temptatores et terrentur,
Ne nos nimis Incitent.

9 a. Per virtutes angelicas
Complet Deus mirificas
Actiones ;

9 b. Summa nobis archangeli,
Minores ferunt angeli
Lectiones.

10 a. O beatae coeli mentes,
Gubernentur omnes gentes
Vestris ministeriis ;

10 b. Incendatis frigescentes,
Illustretis nescientes,
Insit rex praecordiis.

11a. Impugnantes expugnate,
Principantes ordinate,
Praesides dirigite,

11b. Imbecilles roborate,

Summa summis nuntiate,
Parva parvis dicite.

12 a. Sed tu, pater et dux bone,
Victor hostis et patrone
Michael fidelium,

12 b. Legem pone mandatorum

Nosque choris angelorum

Transfer post exsilium.