390. De quolibet Doctore.

la. Pangat nostra contio
in sanctorum gloria

1b. Puro corde, mente pia
laudum Christo carmina.

2 a. Qui diversa

pro meritorum qualitate
distribuit munera,

2 b. Pravis poenas,

gaudia justis sempiterna
in sede aetherea.

3 a. Ubi odor

ineffabilis fraglat,

3b. Laus praeclara
incessanter resultat.

4 a. Angelorum

militia, patriarcharum
prophetarumque caterva,

4b. Apostolorum

sacer chorus, laureata
martyrum quoque agmina,

5 a. Confessorum

virginumque turma

5b. Nova dulci

voce promunt cantica.

6 a. Hac quidem In die
sancti Laudi
venerandi solemnia

6 b. Qua carnis exutus
ergastulo
regna petiit supera.

7 a. Quo supernorum concivis
factus et conviva,

7 b. Jucundatur et exsultat
in laude et gloria.

8 a. Nos ergo tanti patris
pio modulo sacra
concelebremus festa

8b. Congratulantes ei
Deo symphonizando
voce mixolydica.

9 a. Supplici corde
ejus digna
poscentes magnalia,

9b. Ut sancti meritis
sui nostras
purificet animas

10 a. Sanctique spiritus
repleat gratia.

10b. Quo spirituali
edocti cithara,

11a. Diatessaron beata
diapentico
sensu nacta
diapason
citharizemus vera,

11b. Et harmoniae coelestis
cordis fidibus
proportionati
summi regis
conjubilemus aula.

12 a. O sancte nostra
Laudi
exaudi precamina

12b. Ac summo patri
repraesenta
per Christum Impetrata.

13. Laus In te sit Deo
tibique In eo
gloria.