Acta Apostolicae Sedis - Commentarium Officiale622

Paucis annis ante mortem episcopatus ordine est insignitus.

Quamvis summa deditione per universum vitae suae cursum ministerium

peregerit, non defuerunt illi incomprehensiones, reluctationes, asperitates,

tribulationes varii generis: attamen spiritu fidei et fortitudinis suffultus, Pa-

ter Bernardinus omnia absque dubio et haesitatione Deo confisus oppetivit.

Diuturna quoque aegritudo, quae conduxit eum ad extremum vitae cursum,

testimonium eius adhaesionis ad Domini voluntatem congruenter constituit.

In loco Quaracchi placide quievit die 7 mensis Maii anno 1895.

Perpensa sanctitatis fama, qua Servus Dei vivens fruebatur et magis adhuc

post mortem, Romae instructus est Processus Informativus a die 23 mensis

Iunii anno 1945 ad diem 28 mensis Iunii anno 1950, iisdemque annis Assisii,

Venetiis et Florentiae peracti sunt Processus Rogatoriales, quorum iuridicam

validitatem agnovit Congregatio de Causis Sanctorum, Decretum edens die 22

mensis Ianuarii anno 1993. Apparata Positione, ut de more disceptatum est

num Servus Dei virtutes heroicum in gradum exercuisset. Peculiaris Congressus

Consultorum Theologorum die 16 mensis Ianuarii anno 2007 affirmativum

ediderunt responsum. Item Patres Cardinales et Episcopi in Sessione Ordinaria

die 20 mensis Maii anno 2008 congregati, audita relatione Ponentis Causae,

Exc.mi D.ni Petri Iacobi De Nicolò, Nuntii Apostolici, agnoverunt Servum

Dei Bernardinum a Portu Romatino in theologalibus, cardinalibus eisdemque

adnexis exercendis virtutibus heroicum attigisse gradum.

Facta demum de hisce omnibus rebus Summo Pontifici Benedicto XVI

per subscriptum Cardinalem Praefectum accurata relatione, Sanctitas Sua,

vota Congregationis de Causis Sanctorum excipiens rataque habens, hodierno

die declaravit: Constare de virtutibus theologalibus Fide, Spe et Caritate tum in

Deum tum in proximum, nec non de cardinalibus Prudentia, Iustitia, Tempe-

rantia et Fortitudine, iisque adnexis, in gradu heroico, Servi Dei Bernardini a

Portu Romatino (in saec.: Iosephi Dal Vago), Archiepiscopi titularis Serdicen-

sis ex Ordine Fratrum Minorum, in casu et ad effectum de quo agitur.

Hoc autem Decretum publici iuris fieri et in acta Congregationis de Causis

Sanctorum Summus Pontifex referri mandavit.

Datum Romae, die 3 mensis Iulii, A.D. 2008.

Iosephus card. Saraiva Martins

Praefectus

L. e S. e Michaël Di Ruberto

Archiep. tit. Lunensis, a Secretis