Acta Apostolicae Sedis - Commentarium Officiale616

Missae participatione fulsit. Praecipuam habuit devotionem erga Mariam

Virginem, in cuius honorem crebrius ieiunabat. Milites adhortari solebat, ut

Deo semper confiderent et sacramentis interessent, omnes Dei auxilio et

Beatissimae Virgini intercessioni victorias suas assignans. Ad lumen tempo-

rum vitae suae, necnon societatis et culturae coaevorum adiunctorum et

spiritualitatis ac religiositatis sensuum, militiam suam tamquam ministerium

in servitium iurium populi Lusitani ad liberam suipsius gubernationem ab

omni aliena potestate solutam ratus est.

In Matrem Dei comes maximam gratiam pandit, apud Sanctuaria Bea-

tissimae Virginis peregrinus se conferens atque plurimas ecclesias in eiusdem

honorem deditas suo sumptu aedificans. Tanti herois nomini iunguntur quo-

que monasterium et ecclesia Sanctae Maria a Victoria, architecturae goticae

Lusitanae opus venustissimum, omnibus sub nomine « de Proelio » seu vulgo

da Batalha notum et Ioannis I regis iussu exstructum.

Plurima belli negotia a domo Nonium invitum diutissime seposuerunt,

qui autem post mortem uxoris, anno 1387 occursam, alteras nuptias renuit.

Testimonia scriptorum historiarum Lusitaniae illius temporis non modo eum

constans exemplum angelicae puritatis vitae obtulisse conveniunt, sed etiam

nihil militum suorum impudicitiae pati posse.

Summa erga cuiusvis generis egenos benignitate semper eluxit et, pace

cum Castella conventa, bona sua reliquit et habitum carmelitanum induit in

Conventu Ulyssiponensi, quem et ipse fundaverat, condicionem « fratrum

donatorum » et nomen sumens fratris Nonii a Sancta Maria. Intercessio tan-

tum principis domini Duartii, Ioannis I regis filii, eum a novo conventu

procul Lusitania expetendo prohibere valuit, ut assiduas civium illustrium

visitationes effugeret.

Beatus Nonius anno 1431, fortasse die 1 mensis Aprilis, mortuus est, octo

post annos vitae orationi, paenitentiae et caritati erga pauperes omnino de-

ditae. Universa aula regia sollemnibus exsequiis interfuit eius, quem iam

populus acclamaverat sanctum et heroem nationis. Exuviae eius Ulyssipone

in celeberrima ecclesia Carminis iacent.

Summus Pontifex Benedictus XV cultum Nonio a Sancta Maria tributum

confirmare statuit et titulum Beati die 23 mensis Ianuarii anno 1918 publice

probavit. Ob hanc sanctitatis famam, a die 13 mensis Iulii anno 2003 usque

ad diem 13 mensis Aprilis anno 2004 apud Curiam Ulyssiponensem Inquisitio

dioecesana celebrata est, quam supplementum secutum est, quorum auctori-

tas et vis iuridica a Congregatione de Causis Sanctorum Decretis dierum 3

mensis Decembris anno 2004 et 9 mensis Iunii anno 2007 probatae sunt.