Postquam « bonum certamen certavit et cursum consummavit » (cfr 2 Tim

4, 7), Iosephus Di Donna in urbe Andria die 2 mensis Ianuarii anno 1952

animam Domino reddidit. Ob eius mortem ingens luctus factus est, quo

significata est fama sanctitatis admodum radicata in fidelibus eius dioecesis

et in omnibus qui cognoverunt eum.

Hanc propter famam, a die 30 mensis Novembris anno 1956 ad diem 4

mensis Iulii anno 1966 instructus est apud Curiam dioecesanam Andriensem

Processus Ordinarius Informativus, quem secuti sunt duo Processus Rogato-

riales. Per Decretum editum die 18 mensis Octobris anno 1991 Congregatio de

Causis Sanctorum iuridicam Processuum validitatem agnovit. Apparata Po-

sitione, disceptatum est, uti ex consuetudine, utrum Servus Dei virtutes

heroico gradu expleverit. Faventem ferens sententiam, die 7 mensis Novem-

bris anno 2006 actus est Congressus Peculiaris Consultorum Theologorum.

Patres Cardinales et Episcopi congregati in Sessione Ordinaria die 15 mensis

Aprilis anno 2008, audita relatione Ponentis Causae, Exc.mi D.ni Petri Ia-

cobi De Nicolò, Archiepiscopi tit. Martanaensis, testati sunt Servum Dei

Iosephum Di Donna in exercendis theologalibus, cardinalibus eisque adnexis

virtutibus heroicum attigisse fastigium.

Facta postmodum Summo Pontifici Benedicto XVI de omnibus praemis-

sis accurata relatione per subscriptum Cardinalem Praefectum, Beatissimus

Pater vota Congregationis de Causis Sanctorum amplectens et rata habens,

die infra signato sollemniter declaravit: Constare de virtutibus theologalibus

Fide, Spe, Caritate tum in Deum tum in proximum, nec non de cardinalibus

Prudentia, Iustitia, Temperantia et Fortitudine, iisque adnexis, Servi Dei Iose-

phi Di Donna, ex Ordine Sanctissimae Trinitatis, Episcopi Andriensis, in gradu

heroico exercitis, in casu et ad effectum de quo agitur.

Hoc autem Decretum Beatissimus Pater in vulgus edi et in Acta Congre-

gationis de Causis Sanctorum referri mandavit.

Datum Romae, die 3 mensis Iulii A.D. 2008.

Iosephus card. Saraiva Martins

Praefectus

L. e S. e Michaël Di Ruberto

Archiep. tit. Lunensis, a Secretis

Congregatio de Causis Sanctorum 625