208 Acta Apostolicae Sedis - Commentarium Officiale

Proinde, Apostolicae Nostrae potestatis plenitudine, ab archidioecesi

Tegucigalpensi territorium paroeciarum statuimus distrahi, quae vulgari

nomine inscripta sequuntur: Inmaculada Concepción in urbe Danliensi et

Sagrado Corazón de Jesús in eadem; Nuestra Señora de la Candelaria in

Jacaleapa; Santa María de Suyapa in Santa María; San Juan Bautista in

El Paraiso; San Isidro Labrador in Güinope; Señor de las Aguas in Moroceli;

Nuestra Señora de los Angeles in Teupasenti; Nuestra Señora del Perpetuo

Socorro in Trojes; San José de la Montana in Yuscarán et San Francisco

de Asis in Texiguat; atque ex ita distractis territoriis novam dioecesim,

Danliensem nuncupandam, earumdem paroeciarum finibus circumscriptam,

erigimus ac constituimus.

Huius novae dioecesis sedem in urbe vulgo Danli decernimus templumque

paroeciale ibi exstans, Deo in honorem Immaculatae Conceptionis Beatae

Mariae Virginis dicatum, ad gradum et dignitatem ecclesiae Cathedralis

evehimus, mandantes ut ibidem Capitulum Canonicorum ad normam iuris

erigatur. Novam insuper dioecesim Danliensem statuimus Metropolitanae

Ecclesiae Tegucigalpensis suffraganeam eiusque Episcopum metropolitico

iuri Archiepiscopi pro tempore eiusdem Ecclesiae Metropolitanae subici-

mus. Exinde, acta et documenta omnia, quae ad novam dioecesim eiusque

clericos, fideles et bona temporalia forte pertineant, a Curia Tegucigalpensi

ad Curiam Danliensem quam citius transmittantur et in apto archivo cus-

todiantur, ad normam iuris.

Mandamus, insuper, ut dignae Praesulis sustentationi atque congruo

conditae dioecesis patrimonio provideatur Curiae emolumentis, fidelium

oblationibus et portione ei obveniente ex divisione, ad normam can. 122

Codicis Iuris Canonici facienda, honorum, quae hactenus ad Mensam ar-

chiepiscopalem Tegucigalpensem pertinuerunt. Item ut Pastori novae dioece-

sis in potestate regiminis exercenda validum tribuatur adiutorium, Consilium

Presbyterale, Collegium Consultorum et Consilium a Rebus Oeconomicis

quamprimum constituantur.

Quoad vero Seminarii dioecesani erectionem necnon candidatorum ad

sacerdotium institutionem, praescripta iuris communis serventur, attentis

normis ac regulis a Congregatione pro Clericis statutis. Clericis permanens

institutio suppeditetur et, cum fas erit, selecti presbyteri ad curriculum

studiorum complendum Romam mittantur.