212 Acta Apostolicae Sedis - Commentarium Officiale

Perdurante sanctitatis fama et signorum, inter annos MCMXCIV et MCMXCVI

Inquisitio dioecesana Cracoviae est celebrata. Adimpletis omnibus secundum

iuris normas atque Positione parata, Consultores Historici antea ac deinde

Consultores Theologi sententiam positivam circa sanctitatem Servae Dei

protulerunt. Patres Cardinales et Episcopi in Sessione Ordinaria die XI

mensis Decembris anno MMXII edixerunt Servam Dei heroicum in modum

virtutes exercuisse. Summus Pontifex Benedictus XVI Congregationi de Cau-

sis Sanctorum facultatem dedit ut Decretum super virtutibus die XX mensis

Decembris eiusdem anni promulgaret. Pro Beatificatione praebita est deinde

asserta quaedam mira sanatio, quam Consultores Medici eiusdem Congrega-

tionis iudicaverunt sub luce scientiae inexplicabilem. Consultores Theologi

sanationem intercessioni Venerabilis Servae Dei adscripserunt; eiusmodi

sententiam etiam Patres Cardinales et Episcopi in Sessione Ordinaria die

XIX mensis Maii anno MMXV edixerunt. Nosmet Ipsi Congregationi de Causis

Sanctorum facultatem fecimus ut Decretum super miro die V mensis Iunii

anno MMXV promulgaret. Decrevimus etiam ut Beatificationis ritus die XXVII

mensis Septembris anno MMXV Cracoviae perageretur.

Hodie igitur eadem in urbe de mandato Nostro Venerabilis Frater Nos-

ter Angelus S.R.E. Cardinalis Amato, S.D.B., Praefectus Congregationis de

Causis Sanctorum, textum Litterarum Apostolicarum legit, quibus Nos Ve-

nerabilem Servam Dei Claram Szczęsna in Beatorum numerum adscribimus:

Nos, vota Fratris Nostri Stanislai S.R.E. Cardinalis Dziwisz, Archiepisco-

pi Metropolitae Cracoviensis, necnon plurimorum aliorum Fratrum in Epis-

copatu multorumque christifidelium explentes, de Congregationis de Causis

Sanctorum consulto, auctoritate Nostra Apostolica facultatem facimus ut

Venerabilis Serva Dei Clara (in saeculo Ludovica Szczęsna), virgo, Confun-

datrix Congregationis Servularum Sacratissimi Cordis Iesu, semper parata

divinam voluntatem suscipere et singulari caritate indigentiores curare,

potissimum puellas ac aegrotantes, Beatae nomine in posterum appelletur,

eiusque festum die septima mensis Februarii, qua in caelum orta est, in

locis et modis iure statutis quotannis celebrari possit. In nomine Patris et

Filii et Spiritus Sancti.

Clara haec mulier diligentem ostendit spiritalem progressum, vitae coti-

dianae in fiducia et laetitia exemplum, Christi eiusque Ecclesiae dilectionem

atque insignia dedit pietatis testimonia.