40.

De passione Domini.

1. Pange, lingua, gloriosi

proelium certaminis

Et super crucis trophaeum

dic triumphum nobilem,

Qualiter redemptor orbis

immolatus vicerit.

2. De parentis protoplasti

fraude factor condolens,

Quando pomi noxialis

morte mors occubuit,

Ipse lignum tunc notavit,

damna ligni ut solveret,

3. Hoc opus nostrae salutis

ordo depoposcerat,

Multiformis proditoris

ars ut artem falleret,

Et medelam ferret inde,

hostis unde laeserat.

4. Quando venit ergo sacri

plenitudo temporis,

Missus est ab arce patris

natus orbis conditor

Ac de ventre virginali

carne factus prodiit.

5. Vagit infans inter arta

positus praesepia,

Membra pannis involuta

virgo mater alligat,

Et pedes manusque crura

stricta cingit fascia.

6. Gloria et honor Deo

usquequo altissimo,

Una patri filioque,

inclito paraclito,

Cui laus est et potestas

per aeterna saecula.