41.

Alius.

1. Lustra sex qui jam peracta
tempus implens corporis,

Se volente natus ad hoc,
passioni deditus,

Agnus in cruce levatus
immolandus stipite.

2. Hic acetum, fel, arundo,
sputa, clavos, lancea,

Mite corpus perforatur,
sanguis unda profluit,

Terra, pontus, astra, mundus,
quo lavantur flumine.

3. Crux fidelis inter omnes,
arbor una nobilis,

Nulla silva talem profert
fronde, flore, germine,

Dulce lignum, dulces clavi,
dulce pondus sustinent.

4. Flecte ramos, arbor alta,
tensa laxa viscera,

Et rigor lentescat ille,
quem dedit nativitas,

Ut superni membra regis
miti tendant (!) stipite.

5. Sola digna tu fuisti,
ferre saecli pretium,
Atque portum praeparare
nauta mundo naufrago,
Quem sacer cruor perunxit
fusus agni corpore.

6. Gloria, et honor Deo
usquequo altissimo,

Una patri filioque, Inclito paraclito,

Cui laus est et potestas
per aeterna saecula.