55.

Alius.

1. Praecursor alti luminis
Et praeco verbi nascitur,
Laetare, cor fidelium,
Lucemque gaudens accipe.

2. Mirando cujus saeculi
Nativitas per angelum
Intonuit parentibus
Pia fide jam praeditis.

3. Sublime cui vocabulum
Johannes Ipse Gabriel
Imponit et clarissima
Ipsius acta praecinit.

4. Qui matris adhuc parvulus
Vulva retentus spiritu
Percepit almus gratiam,
Festis futurus gloriae.

5. Nec dumque natus jam dedit
De luce testimonium)
Quod natus admirabili
Complevit Ipse gloria.

6. Sic plurimos ex Israel
Christi fidei subdidit,
Et corda patrum In filiis
Docens superna transtulit.

7. In Eliae qui spiritu
Venit propheta, semitam
Parare Christo, ac plebibus
Iter salutis pandere.

8. Quo feminarum In filiis
Propheta major nullus est,
Quin Ipse miris actibus
Plus quam propheta claruit.

9. Baptisma poenitentiae
Qui praedicabat ac dedit,
Turbasque Jesu gratiae
Illuminandas obtulit.

10. Ipsum Jesum, qui omnia
Sancto lavans In spiritu
Emundat, In Jordanicis
Tinxit fluentis gurgitis.

11. Et baptizato protinus
Aperta vidit aethera,
Nobis suo baptismate
Pandit poli qui regiam.

12. Atque In columba spiritum
Illum super descendere
Vidit, qui doli nescius
Mentes requirit simplices.

13. Audivit et vocem patris:
Dilectus est haec filius
A saeculo dixit meus,
In quo mihi complacuit.

14. Edoctus his oraculis
Baptista Jesum praedicat
Natum Dei, qui In spiritu
Sancto fideles baptizet.

15. Quid sermo noster amplius
Hujus canat praeconia,
De quo patris vox filio
Olim locuta praecinit:

16. En mitto, dixit, angelum
Tuam paret qui semitam,
Vultum praecurratque tuum
Solem lucens ut lucifer.

17. Praesta, pater piissime.