60.

Item alius.

1. Apostolorum gloriam
Hymnis canamus debitis,
Votis vocemus annuis,
Jesu fave precantibus.

2. Bar Jona, Simon Petrus
Et doctor almus gentium
Festiva saeclis gaudia
Suo dicarunt sanguine.

3. Conjunxit unus exitus,
Quos dispar ortus protulit,
Terris simul non editi
Simul petunt coelestia.

4. Diversa verba plebium
Ad astra cogunt agmina
Unaque condunt plurimis
Aulam Deo de gentibus.

5. Ecclesiae princeps sacer
In monte Jesum conspicit
Vocemque patris Igneo
Audit poli de vertice.

6. Fulgentis ascendit poli
Tertia Paulus edita,
Arcana discit, alteri
Proferri nulli quae licet.

7. Gressus Cephi per caerula
Christi juvantur dextera,
Christus suos ne saeculi
Demergat aequor erigit.

8. Hujus pericla saeculi
Vinci fide credentium,
Paulus docet, jam naufragos
Salvans ab undis socios.

9. Imis Simon e fluctibus
Mundi fideles extrahens
Pisces bonos ut libere
Ad lucis effert patriam.

10. Xriste, precamur ut quibus
Laudes ovantes dicimus,
Horum frui nos lucidis
Dones per aevum aspectibus.

11. Ymnisonis per aethera
Apostolorum coetibus
Noster chorus hic consonet,
Psalmis canoras dulcibus.

12. Deo patri sit gloria
Ejusque soli filio
Cum spiritu paraclito
In sempiterna saecula.