100.
De uno confessore.

1. Jesu, redemptor omnium,
Perpes corona praesulum,
In hac die clementius
Nostris faveto vocibus.

2. Tui sacri qua nominis
Confessor almus claruit,
Cujus celebrat annua
Devota plebs solemnia.

3. Qui rite mundi gaudia
Hujus caduca respuens,
Cum angelis coelestibus
Laetus potitur praemiis.

4. Cujus benignus annue
Nobis sequi vestigia,
Hujus precatu servulis
Dimitte noxam criminis.

5. Sit, Christe, rex piissime,
Tibi patrique gloria
Cum spiritu paraclito
In sempiterna saecula.