127.

Ad Odonem regem.

1. Odo, princeps altissime

Regumque potentissime,

Regale sceptrum suscipe

Longo regendo tempore.

2. Te crux divina muniat,

Te virtus alma protegat,

Te neuma sacrum repleat

Et ad superna dirigat.

3. Sis Deo dignus ut Abel,

Sis fidelis ut Samuel,

Sic judices ut Daniel

Et credas ut Nathanael.

4. Vivendo vivas ut Enoch,

Pacificus uti Sadoch,

Sis benedictus ut Jacob,

Sanctissimus ut fuit Job.

5. Sis eloquens ut Abraham,

Benedictus ut Balaam,

Robustus ut Jeroboam,

Aedificis ut Joatam.

6. Sis sapiens ut Salomon,

Fortissimus sicut Samson,

Pulcherrimus ut Absalon

Et cautus sicut Gedeon.

7. Monarcha sis ut Julius.

Sed Deo dignus melius,

Ut David, rex mitissimus,

Et Judas, victor optimus.

8. Ut Alexander maximus

Pugnator sis aptissimus,

Tibique sit contrarius

Ceu fugiens Pompegius.

9. Qui mea laudant carmina

Pigmenta bibant dulcia,

Quibusque sunt contraria,

Spumosa detur cicera.

10. Amen resultet Gallia,

Amen cantent Burgundia,

Bigorni regni spatia,

Vasconia et Teutonia.