104 Acta Apostolicae Sedis - Commentarium Officiale

LITTERAE APOSTOLICAE

Venerabilibus Servis Dei Mario Vergara et Isidoro Ngei Ko Lat Beatorum honores decernuntur.

FRANCISCUS PP.

Ad perpetuam rei memoriam. - « Accipietis virtutem superveniente Sancto Spiritu in vos et eritis mihi testes et in Ierusalem et in omni Iudea

et Samaria et usque ad ultimum terrae » ( Act 1, 8).

Venerabilis Servus Dei Marius Vergara proprium hoc divinum fecit effa-

tum atque vitam suam Evangelio nuntiando in terra missionis dicans, plenam

cum Christo similitudinem est assecutus martyrium ob fidem accipiens.

In « Frattamaggiore », provinciae Neapolitanae et dioecesis Aversanae,

die XVIII mensis Novembris anno MCMX est natus. Curriculis institutionis pue-

rilis expletis, patre etiam renuente, Aversanum ingressus est Seminarium.

Mense Octobri anni MCMXXVII in Seminarium « Posilippo », Neapoli, transit,

a sodalibus Societatis Iesu directum. Hic Pontificium Institutum pro Mis-

sionibus Exteris cognovit. Statim missionale Seminarium ingredi voluit, sed

appendicite coactus est ut domum rediret. Difficilis eventus fortiorem etiam

reddidit fidem eius eiusque propositum missionalis navitatis. Die XI mensis

Augusti anno MCMXXIX ut ingredi posset in PIME postulavit atque tertium

annum Lycei Modiciae frequentavit. Pleuritide correptus iterum coactus est

ut familiam rediret. Morbus voluntatem eius vocationis sequendae roboravit

ita ut, sanatus, in Institutum rediret atque novitiatum Ianuae incipere po-

tuit. Adimpletis curriculis universitatis Mediolani, die XXVI mensis Augusti

anno MCMXXXIV sacerdos est ordinatus atque in Birmaniam, hodie Myanmar,

missus, dioecesim in Tunguensem. Se potissimum ediscendis sermonibus loci

dicavit atque paucos post menses in regionem « Citatiò » est missus. Vastitas

missionis non fregit animum eius qui pro populo laboravit veluti sacerdos,

educator, medicus, administrator et pater pro multis pueris parentibus or-

batis in plurimis locis sibi concreditis. Eius caritas sine limitibus incipiente

secundo bello mundiali est interrupta. Birmania illo tempore patrocinio

utebatur Anglico atque omnes Italici, inimici considerati, in custodiam sunt

inclusi et in Indiam deportati.