500 Acta Apostolicæ Sedis - Commentarium Officiale

CONGREGATIO DE CAUSIS SANCTORUM

CARACENSIS

Beatificationis et Canonizationis Servae Dei Mariae a Monte Carmelo (in saec.: Carmelitidis Helenae Rendiles Martínez), Fundatricis Instituti Ancillarum a Iesu v.d. Siervas de Jesus de Venezuela (1903-1977)

DECRETUM SUPER VIRTUTIBUS

« Dilectus meus mihi et ego illi, qui pascitur lilia » ( Ct 2, 16). Et « Vita mea

non oportet sit, ut dicam, humana - inquit Mater Maria a Monte Carmelo

Rendiles Martínez - sed omnino supernaturalis: utpote sponsa alicuius Dei,

eandem sponsa sponsi sui vivit vitam et eodem sponsi sui sese aluit cibo ».

Plenitudo fiduciae in dilectione Patris, in infinita misericordia Dei Filii

et in unctione Spiritus Sancti columna est adepta ac cumulata consecra-

tionis Domino, quae e vita et conversatione Servae Dei Mariae a Monte

Carmelo Rendiles Martínez eminet: amori enim Christi plene illigata, sese

matrem Ecclesiae necessitatibus promptam fecit et filiabus suis spiritualibus

munus hoc tradidit, quas eucharisticae adorationi et sacerdotum servitio

consecravit.

Serva Dei die 11 mensis Augusti anno 1903 Caracae in Venetiola orta

et die 24 insequentis mensis Septembris ad baptismalem fontem regenerata

est. Tertia ex novem filiis coniugum Ramiri Rendiles et Annae Antoniae

Martínez, honestissimis omnibus religiosis, humanis et civilibus institutis

informata est. Iam inde a pueritia, iucunditate et serenitate indolis floruit,

etsi laevi brachii egena omnem vitam degit artus fictilis pondus circum-

vectans magnum. Fratris minoris anno 1921 et triennio post patris mors

spiritualis maternitatis affectum in ea multiplicavit et persollicitam eam sive

misericordiae ac benignitatis patefaciendae sive fratrum iuniorum incremen-

ti adiumentique matris prosequendi reddidit. Illis annis etiam apostolatui

in paroecia attendit, doctrinae eucharisticae scilicet pueris tradendae et

operibus caritatis, atque iter vocationis discernendae inivit.