504 Acta Apostolicæ Sedis - Commentarium Officiale

BARCINONENSIS-MATRITENSIS-VALENTINA-MALACITANA

Beatificationis seu Declarationis Martyrii Servorum Dei Mauritii Íñiguez de Here-

dia Alzóla (in saeculo: Alexandri) et XXIII Sociorum Ordinis Hospitalarii Sancti

Ioannis de Deo († 1936-1937)

DECRETUM SUPER MARTYRIO

« Et eritis odio omnibus propter nomen meum. Et capillus de capite vestro

non peribit. In patientia vestra possidebitis animas vestras » ( Lc 21, 17-19).

Taeterrimo flagrante bello civili in Hispania, inter annum videlicet 1936

et 1939, id quod constat inter omnes, inhumana prorsus in Ecclesiam late

incubuit persecutio, qua credentes haud pauci, veterum fidei adsertorum

facinora aemulati, atrocissima quaeque pro Christo pati ipsamque cruentam

vitae iacturam facere non dubitarunt. Pars enim iniquissimo statuto discrimi-

ne propriis iuribus spoliati atque a civitate paene exclusi, pars comprehensi

vel etiam interfecti sunt. Quam quidem insectationem apprime evenisse in

christiani nominis odium, et solam fidem fuisse eius causam, nemo est qui

non videat. Etenim tam turbido tempore impii scelestique homines, marxiana

doctrina madentes iidemque anarchica somnia consectantes, infestissime in

Ecclesiam saevire ausi sunt, sacras aedes, domus, asceteria, pia instituta,

ludos ferocissime depopulantes, catholicae religionis sacrosancta signa vio-

lantes, sacerdotes egregios, sacras virgines, Deo devotos viros, pios laicos

suo arbitratu mactantes.

Tot inter praeclaros christifideles, qui in turbulentissima illa tempestate

neci traditi sunt, quattuor et viginti ex Hospitalario Ordine Sancti Ioannis

de Deo religiosi accensentur viri, qui alii alio tempore et loco summa iniu-

ria immanique crudelitate interfecti fuere. E quorum glorioso manipulo ad

Minorissanam duo pertinent sodalitatem; alius venit ex oppido Ciempozue-

los, alius e Matritensi valetudinario, quod a Sancto Raphaele Archangelo

nomen sumit, alius ex oppido Calafell; undecim denique Valentini, octo

Malacitani sodales sunt.

Inter egregia eiusdem Ordinis instituta floruit Minorissae eo tempo-

re atque eminuit valetudinarium: amantissimam enim curandis infantibus,

seu pauperes hi essent seu vertebrarum laborarent infirmitate, sex inibi