Caput III.

 

Hic agnus Paschae suspenditur hostia ligno;
Hunc Paulus phase, conscribens decreta Corintho,
Occisum tradit vitamque, Deumque futurum
1064C Promissum patribus, quos illectaverat ante.
Cernite quid virtus, quis paschae possit imago,
Sic verum quid sit poteritis pascha videre.
Ne fidus pater, et vates cui pignus et haeres
Charus erat, quem forte Deus donaverat illi,
1065A Hunc Deo mactaret, merito tentatus amore;
Supplicium magnum; sanctus pro sanguine sanguis
Connexus capite spinis ostenditur agnus
Hostia sancta Deo. Cujus de morte piati
Esset ut in signum et vastatae pignora gentis,
Sanguine signantur postes et limina multa,
Immane auxilium, caro testis creditur esca.
Jesus transgressus Jordan terraque potitus,
Lege dedit pascham, gaudens atque immolat agnum.
Et reliqui magni reges sanctique prophetae,
Non ignorantes certae promissa salutis,
Ingentemque, metu pleni, transcendere legem,
Venturam summae virtutis imagine molem,
Inspectam e speculo celebrarunt ordine pascham.
Denique, si celeri primordia mente recurras,
1065B Invenies funesta nimis, post impia verba:
Credulus heu! facile nudatus tegmine vitae,
Pellibus ut tegeretur homo, suspenditur agnus,
Aut peccata necat, aut sanguine funera delet,
Aut coperit nudos, fovet aut suo vellere vulnus ,
Non pecoris sanguis humano sanguine pluris,
Ut pro peccatis oblatus dirimat iram,
Aut multae plebis, veluti si carior agnus.
Auxilium immane, tantae tutela salutis,
Oblatus potuit pretium satis esse redemptis.
At Deus omnipotens, coeli terraeque creator,
Immensus, vivus, perfectus, luce perennis,
His non placatur, pecudum neque sanguine gaudet.
Omnia mactentur pecora, grex omnis in aras
Decremet, ut veniam vel peccati expiet unus:
1065C Nequaquam Domini sapiens maculata figura,
Tam vili pretio caro foeda paravit honores;
Sed spes et promissa fides mortalibus olim,
Haec operata tulit, magnae rationis imago,
Praemeditata Patris, nimia pietate parata
Venturum Christum terris, hominemque futurum;
Quem visum Joannes, baptismi primus apertor,
Et vatum socius, necnon et apostolus ingens,
Praecursor missus certus, testisque fidelis,
Augustus vita, sublimi laude notatus,
Olim pascha Dei, verum quaerentibus agnum,
Ostendit tandem venisse, piacula facti
Qui delicta suo multorum sanguine solvat,
Pro reprobis probus, et charus, pro vilibus unus,
Corpore homo vitaque Deus, mactatus ut agnus,
1065D Acciperet nos et nobis se effunderet ipsum.
1066A Sic placuit Domino mortem spoliare superbam;
Sic poterit miserandus homo sperare salutem.
Hunc pascham Paulus mactatum praedicat agnum;
Nec species Domini pecoris sublimis inertis
Consimilis patitur, quapropter dicitur agnus;
Sed quia lanities renovata haec corpora vestit,
Dat tegimen multis, unquam nec deficit ipse.