Caput VII.

 

Interius templum , populum de nomine Christi
Coelesti cultu, ipsa Dei mandata sequentem
(Personae hic propriae vere non umbra ligatur),
Perfectis rebus completum tradidit ordo.
Arca, sub exemplo, corpus venerabile Christi
Ostendit, sacro per lignum spiritu junctum.
1082B Aeriae pelles caro, non ex semine nata,
Extensa in ligno, simul intus spiritus ardens
Aurigera specie conflatus, jungitur illi,
Ut caro pace data, cum spiritu mixta vigeret.
Carnis et urna typum Domini fert aurea plena,
Foederis ipsa novi Dominum declarat aperte;
Manna, quod est panis coelestis verus, in illum
Traditus a Patre, quem tribuit pro pignore sanctis,
Perfecte dabit hunc illis, qui vincula pacis
Semper amatores operum tenuere bonorum.
Et tabulae duplices conscriptae legis, in arca,
Significant simul haec in Christo condita semper,
Qui vetus atque novum mandatum pertulit ipse:
Arca Patris summi, per quem dedit omnia dives.
Et virga styracis fructus nucis adtulit ipsa
1082C (Virginis haec species, genuit quae sanguine corpus),
Conjuncta in ligno, sedabit mortis amarum
Interius fructum dulcem, de Spiritu sancto,
Sicut Esaias virgam de semine Jesse
Praedixit Mariam, de qua flos exit in orbem.
1083A Ara nitens auro coelum declarat in alto,
Quo sanctae subiere preces, sine crimine missae:
Hanc aram Dominus dixit, qua munera si quis
Offert, ut primum pacem cum fratre retractet,
Sic demum flagrare preces ad sidera possunt.
Hoc Christus, victor solus primusque sacerdos,
Obtulit incensum, precibus non arbore natum.
Nam Cherubin cum sit bis binis vultibus unum,
Est unum verbum, per quattuor ordine ductum,
De Patre quae Christus plenissima pertulit ipse
Mandata sperata novi, solatia vitae.
Ast quater alae sex , veteris praeconia verbi,
Testificantis ea quae postea facta docemur;
His alis volitant coelestia verba per orbem;
His etiam Christi sanguis contextus habetur,
1083B Obscurae vatum praesago dictus ab ore.
Alarum numerus antiqua volumina signat,
Esse satis certa viginti quattuor ista,
Quae Domini cecinere vias et tempora pacis.
Haec cohaerere novo cum foedere cuncta videmus:
Sic quoque Joannes, sic pandit spiritus illi
Tot numero solio senioribus insuper albis,
Atque coronatis cohibentibus omnia mitra,
Ad solium Domini, vitreum et mare, stare sub igne,
Quattuor aligera atque oculis animalia plena
Intus et exterius, quae sunt arcana patere,
Significat verbo simul omnia clausa videri;
1083C Nam vitreum flammae mixtum mare, dona lavacri
1084A Spiritu conflato credentibus esse tributa.
Quae pietas Domini! quis tantum dicere possit,
Ante tribunale, ante, pavimentum quae paravit
Ut fora judiciumque sibi anticipare volentes,
Et fugerent, esset properanti copia lata!