Acta Apostolicae Sedis - Commentarium Officiale846

MESSANENSIS -LIPARENSIS - SANCTAE LUCIAE

Beatificationis et Canonizationis Servi Dei Antonii Franco, Praelati Ordinarii

Sanctae Luciae (1585-1626)

DECRETUM SUPER VIRTUTIBUS

«Diliges Dominum Deum tuum in toto corde tuo et in tota anima tua et in

tota mente tua: hoc est magnum et primum mandatum. Secundum autem

simile est huic: Diliges proximum tuum sicut te ipsum » (Mt 22, 37-39).

Doctrina Domini Iesu, ex Matthaei Evangelio nobis tradita, congruenter

ac penitus applicatur ad vitam Servi Dei Antonii Franco: qui enim uti cen-

trum sui curriculi spiritualis amorem in Deum posuit, quod singulis momentis

suae exsistentiae sive in liturgia celebrata sive in servitio tenuioribus prae-

stito est testificatus. Hoc quidem modo iure meritoque haberi potuit authen-

ticum exemplar pastoris, omnino dediti suiipsius abnegationi necnon assiduo

servitio in beneficium portionis gregis Dei suae curae concrediti.

Servus Dei die 26 mensis Septembris anno 1585 Neapoli natus est e

parentibus Orlando Franco, praeclaro Gallicae originis advocato, et Anna

Pisano, filia Baronis oppidi « Pescarola di Caivano ». Pueritiam gessit et

adulescentiam intra ambitum honestae et operosae familiae, alto religioso

spiritu eminentis; protinus enim se praebuit vitae pietatis et necessitatibus

pauperum peculiariter addictum. Iuventutis periodo, dum propositum

accedendi ad sacerdotium in mente nutriebat, Servus Dei indicia ostendit

notabilis propensionis ad studium. Huic favens proposito, pater filium

curavit ad altiora studia evehendum, ita ut, septemdecim annos natus,

lauream in utroque iure apud Studiorum Neapolitanam Universitatem

adipisceretur; eodem anno tonsurae ritui subiectus est. Ita viam arripuit ad

presbyteralem ordinationem.

Brevi tempore Romae commoratus est ad culturalem et spiritualem for-

mationem perficiendam. Postea, desiderio compulsus Cappellani Cohortis

munus adipiscendi, Matritum se contulit et anno 1607 petitionem exhibuit.

Anno vero 1611, presbyter interea ordinatus, Rex Hispaniae Philippus III

decretum emisit quo Servus Dei nominabatur Cappellanus Cohortis, quod

tanti ponderis munus sibi concreditum maxima cum laude persolvit.