660 Acta Apostolicæ Sedis - Commentarium Officiale

ROMANA

Canonizationis Beati Ioannis Pauli II (Caroli Iosephi Wojtyła) Summi Pontificis

(1920-2005)

DECRETUM SUPER MIRACULO

Beatus Ioannes Paulus II (Carolus Iosephus Wojtyła) die 18 mensis Maii

anno 1920 Guadovici in Polonia natus est. Vocatione ad vitam sacerdotalem

percepta, studia Theologiae apud Seminarium clandestinum Cracoviense

iniit et die 1 mensis Novembris anno 1946 presbyteratu est auctus. Dein

in Urbem ad perficienda studia missus est; in patriam redux Theologiae

Moralis et Ethicae apud Seminarium Maius Cracoviense, sicut et apud Fa-

cultatem Theologiae Lublinensem magistri munus explevit. Die 4 mensis

Iulii anno 1958 ordinatus est Episcopus titularis Ombiensis et Auxiliaris

Archiepiscopi Cracoviensis, postea anno 1964 eiusdem Sedis Archiepiscopus

nominatus est ac deinde anno 1967, Sanctae Romanae Ecclesiae Cardinalis

creatus. Tandem ad Petri Sedem die 16 mensis Octobris anno 1978 Summus

Pontifex electus est, Ioannis Pauli II sumpto nomine. Pontificatus eius pe-

culiari miraque apostolica sollicitudine et pastorali navitate eminuit. Post

diutinam infirmitatem, viribus infractis, die 2 mensis Aprilis anno 2005 pie

in Domino quievit, summa sanctitatis fama circumdatus.

Summus Pontifex Benedictus XVI, qui eidem successit, die 19 mensis

Decembris anno 2009 eum theologales, cardinales iisque adnexas virtutes in

modum heroum coluisse decrevit, die 1 mensis Maii anno 2011 in numerum

Beatorum eum referens.

Canonizationis respectu, Causae Postulatio iudicio huius Congregatio-

nis de Causis Sanctorum assertam subiecit miram mulieris cuiusdam sa-

nationem, quae mense Maio anni 2011 in urbe Sancti Iosephi in Costarica

evenit. Haec enim Domina, dum mane ad ineundam operam se conferebat,

vehementem cephaleam percipere coepit, quae procedente tempore adeo

increbuit, ut nauseam quoque eidem afferret. In valetudinario, quo statim

confugerat ad primam curationem habendam remedium quoddam illi sup-

peditatum est et quietis tempus servandum. Pro dolor, labentibus diebus,

signa haec minime recesserunt, immo potius condiciones generales adeo