287. (1. ) Tristichon Malchi ad Deum patrem.

1. Rerum plasmator, Deus, omnipotensque creator, Perpetui nati, patre perpetuo generati, Participes fieri fac nos ab eoque tueri.

2. Principium verum, cui subdita machina rerum Vivit et incedit, respondet, servit, oboedit, Fac tibi nos subici, calcare dolos inimici.

3. Qui Satanam, caelis deiectum vi Michaelis,

In barathrum trudis, hominem pro daemone cudis, Fac, bene vivamus, ne cum Sathana pereamus.

4. Qui post fallacem Sathanam ratione capacem Adam plasmasti, sed eum culpa reprobasti, Casibus innumeris hominis miseri misereris.

5. Qui per Abel, frater quem Cain perdidit ater, Iam Christi rubeum signabas morte tropaeum, Per Christi mortem Christi defende cohortem.

6. Qui per Enoch raptum, paradisi sedibus aptum, Praestruis in fine mundi medicare ruinae, Nunc etiam morbis pietas tua consulat orbis.

7. Qui Noe vexisti super aequor et eripuisti,

Saecula iusta parum cum mersit abyssus aquarum, Ne male mergamur, te quaesumus, eripiamur.

8. Qui per Abram perimis spoliatos rebus opimis Quinque simul reges nisos evertere leges, Quantumcunque vales, nisus preme daemoniales.

9. Qui Loth de Sodomis dux ad campestria promis Perdis et obscaenos Sodomitas stercore plenos, Exime cunctorum nos de puteo vitiorum.

10. Qui Iob vexatum totiens totiensque probatum Sanas divina bona multiplicans medicina, Aspice languentes, fer opem sanaque dolentes.

11. Quique Ioseph gratum tibi servas immaculatum Et dominam cari proprio sinis igne cremari, Effice nos gratos tibi semper et immaculatos.

12. Qui mare siccasti populum per sicca vocasti, Cum superimponis pelagus cuneo Pharaonis, Perde malignantes et nobis insidiantes.

13. Qui Deus Adonai tabulas in monte Sinai Sancto scripsisti digito Moysique dedisti, Per tua mandata vehe nos ad regna beata.

14. Qui nuce, qui flore, qui germine, fronde, virore Gestamen vestis Aaron signis manifestis, Fac, ut amor crescat in nobis spesque virescat.

15. Qui genus omne Chore puncto facis unius horae, Hoc obitu dignos, terram sorbere malignos, Disice placatus nostri genus omne reatus.

16. Qui Phinees ira propria requiescis ab ira

Et removes plagam, dedit ut manus aemula plagam, Vulnera nostrarum sana miserans animarum.

17. Ut male pergentem per asellam verba loquentem, Quod populum vendit, Balaam tua vox reprehendit, Sic mala vitare doceas nos et superare.

18. Qui muros Iericho sub Iosue frangis amico Civibus et turbis deletis illius urbis, Duritiam cordis tollas et crimina sordis.

19. Qui facis exertos Deborae per bella lacertos, Tempora per Sisarae quae clavum fixit amare, Expedias actus, noster cadat hostis abactus.

20. Qui duo signa boni praesaga notas Gedeoni, Quae simul ac vidit, hostilia castra cecidit, Signa triumphandi zabulum dabis et superandi.

21. Qui nece Susannam salvas, maeroribus Annani, Natum dans Annae, cynicos perdendo Susannae, Da subolem vitae, vitae da regna cupitae.

22. Qui subvertis Heli, ne iudicet, et Samueli Das puero vati cathedram vatis reprobati, Nos transferre velis ad regna tui Samuelis.

23. Qui Saulis rabie David manibusque Goliae Eripis et vasti regni sibi sceptra locasti, Eripe nos morti, caelorum iunge cohorti.

24. Qui vim Samsoni dederas, sensum Salomoni

Pacifer est alter, invicti roboris alter

Da dociles mores et vires interiores.

25. Qui tibi Thesbitem iustum, super omnia mitem, Subvehis igne rota regione locando remota, Culpae suspensos nos esse fac irreprehensos.

26. Qui praedam ditis, puerum revocas Sunamitis

Reddunt tartarei iuvenem meritis Helisaei

Nos a peccato redivivos purificato.

27. Quique manum Iudith regis, ut caput extaque fudit Regis Holofernis, et eum turpi nece sternis, Sic vegeta mentem cum daemone bella gerentem.

28. Qui per opem caeli clauso comes es Danieli Per solitumque bonum defendis ab ore leonum, Dextra suo more tua nos trahat hostis ab ore.

29. Qui pueros mire per flammas ire, redire

Cogis inambustos, hymnum tibi pangere iustos, Ure cor et renes nostros et fac tibi lenes.

In allen Hss. geht Str. 1 voraus:

Fecerat et monachus sub eodem tempore Malchus Quaedam scripta precum faciens hoc ordine secum, Illa peroravit, calamo cantuque notavit.

BD haben am Rande zu Str. 20 die Glosse:

Primum signum: Rore madet vellus, sub rore fit arida tellus.

Secundum: Aruit et vellus, maduit sub vellere tellus.