1. Omnipotens flamen, patris prolisque ligamen, Spiritus amborum, parium par nexus amorum, Vivificum numen, oriens de lumine lumen, Pleno sorde, malis, tua sit mihi laus venialis.

2. Hic ubi vult spirat, vadit, manet, omnia girat, Res nova procedit, venit inde nec inde recedit, Mirificum totum sensu linguaque remotum, Expiet hic mentem magnalia tanta paventem.

3. Luminis alme dator, caeli terraeque creator, Ordo, Dei digitus, donum patris, unctio, ritus, Gratia, fons vivus, lex, ignis, amor genitivus, Spiritus, ipse veni, maerentum pectora leni.

4. Pneumate repletis cum mystica dona prophetis Das, opifex horum sapiens mirabiliorum, Mira loqui mutos facis et sapientia brutos, Pneumatis ignaros fac gnaros et tibi caros.

5. Sic ope divina cum claustra salus inopina Virginis intravit, nec se nec eam violavit, Virginei partus utero tu conficis artus; Ad vitam portus sit nobis illias ortus.

6. Sic avis in specie partum super ipse Mariae Veneras et mundas Iordanis feceras undas, Intrat aquas harum duce te plasmator aquarum; Munditiae munus praebete, duo Deus unus.

7. Discipuli Christi, quibus ignea dona dedisti, Fantur inaudita nec in hac communia vita, Gens stupet, arescit, sonus viget, gloria crescit; Propitius dona nobis haec ignea dona.

8. Subiuga sub ritum fidei summe stabilitum, Qui coadunasti gentes, quas ante creasti Cum patre cum nato deitate tibi sociato; Annue, gens eadem compagine vivat eadem.

9. Catholicae testes fidei qui fingis agrestes,

Per quam dulce mori nec parcere velle cruori Martyribus donas et eos super astra coronas, Quo vivant tecum, da nobis vivere secum.

10. Quod nocet, extricas, Satanae fraudes inimicas Vi premis aeterna, componis in arce superna Elysiae sedis, quos dignos lumine credis; Hanc, petimus, sedem per te mereamur et aedem.