1. Christe, patris verbum, qui destruis omne superbum, Exaltas humiles, tumidos reputas tibi viles, Cum patre maiestas, cui gloria, summa potestas; Esto memor memorum, remove genus omne tumorum.

2. Factor facturae ratione tibi placiturae, Cum non essemus, qui feceris, ut fieremus, Lapsos postea nos tollis de pulvere sanos; Nunc etiam sana nova vulnera et veterana.

3. Virgine de sacra sine semine qui caro sacra Et Deus egrederis et in hac hominis misereris, Sic duo, sic unum, ne sis duo, Christus, at unum, Ne ruat in peius, hominem serva, genus eius.

4. Sic homo, sic Deus es, non unus ut esse recuses, Sic caro, sic anima duo, sed substantia prima Et species simplex, hominis substantia duplex; Respice figmentum, caro carnem, membra parentum.

5. Hanc tibi pro reprobvis carnem placuit dare nobis, Nobis, pro nobis, de nobis, omnia nobis, Qui tibi credidimus, fidei ruga quique subimus; Hoc, quod es, et serva, rogat haec humana caterva.

6. Hoc, quod habes et arnas, carnem caro nostra reclamat, Hac alapas, letum, convitia fers et acetum, Sputa, fel et miseris, Deus, hac in carne mederis; Aegrotos cernas, medicinas adde supernas.

7. Quique resurgendo, scandendo, dona serendo Mystica de caelis, vatis promissa Iohelis, Frigida corda virum reddis flammantia mirum; Ut facis haec, vere fac nos hoc igne calere

8. Gloria cui Domino perpes de funere trino,

Dasque tribus vitam mortemque repellis avitam, Urna, domus, porta testes, quia lux redit orta; Erige labentes et adhuc in sorde iacentes.

9. Ut tibi baptistam Iohannem sive sophistam Dissimilem iustis facis uti melle locustis Et iugulo plecti nec vero morte reflecti; Fac nos cunctorum luxus odisse ciborum.

10. Ut tribuis Petro solacia carcere taetro, Dura catenarum disrumpens vincla suarum, Vinctus ab Herode liber fugit indice Rodae; Vincula nostrorum pariter dissolve malorum.

11. Ut facis electum tibi vas in quadra refectum, Cum fureret, Saulum, mutato nomine Paulum, Mox infecundi verbum parit orbita mundi; Nos ita mutato tibi quadrifidosque dolato.

12. Ut tuus Andreas, quem puniit hostis Aegeas, Cum patitur pro te, Salve crux, inquit, amo te, Te per te fruitur, flammis alius sepelitur; Sic nobis dona requiem secumque corona.

13. Utque sub insano Iohannem Domitiano

Illaesum pleno pice, sulphure prodis aeno, Vita redit iuvenum, sua perdit iura venenum; Perpetuus custos sic omnes protege iustos.

14. Cum lapidaretur, tua quem tutela tuetur,

Stephanus invictus, lapidum non senserat ictus, Agnum cumque videt caelo, sua vulnera ridet; Sic mala nos mundi contemnere fac fugibundi.