1 Jesu Christe, Deus noster, Bone pastor et magister, Qui cum esses forma Dei Coaequalis patris tui, 5 Propter hominum salutem Induisti carnis vestem Et de ventre virginali Tamquam sponsus processisti. Sic in carnis vetustate

10 Conversatus sine labe, Ut et opus adimpleres Et exemplum nobis dares; Opus, inquam, pietatis, Superans affectum mentis.

15 Contumeliis vexatus Et in crucem sublevatus Generalis mortis iura Destruxisti morte tua. Dormivisti, surrexisti,

20 Super caelos ascendisti, Inde venies in fine, Quae fecisti, iudicare, Redditurus digna factis Cum redditione carnis.

25 Deus-homo, Iesu Christe, Miserorum, miserere; Deus-homo, rex caelorum, Miserere miserorum. Huius fidei confessor,

30 Licet reus et transgressor Duplex, oro, Iesu Christe, Nomen super nomen omne, Ut peccata confitenti Et. virtutes anhelanti

35 Haec condones, illas dones,

Sicut ipse docens mones, Ut et lumbos praecingamus Et lucernas teneamus. Cum virtutes mandas quaeri,

40 Quas appellas regnum Dei, Da, quod iubes, ut quaeramus, Et sic iube, quod agamus. Inter cuncta, quae requiro, Unum est, ad quod suspiro,

45 Quod exposco speciatim, Hoc et posco nominatim, Contra carnis corruptelam A te flagito medelam. Propter tuam pietatem

50 Dona mihi castitatem Et me ipsum et te nosse, Sicut est humanum posse. His, ex quibus voluisti Me secundum carnem nasci,

55 Et maioribus ipsorum Computatis retroversum Cunctis praesta, Deus dives, Vitam inter tuos cives. Fratres meos et sorores

60 His in donis fac consortes; Parentela mihi iunctos, Clemens Deus, salva cunctos. Omnes, qui fideles vivunt Vel fideles obierunt,

65 Sempiterna fac quiete Frui sine meta metae. Sit laus patri sempiterno Filioque coaeterno, Tibi, flamen utriusque,

70 Laus sit aequa cum utroque.