290. (4. ) Tristichon ad sanctam Crucem.

1. 0 crux, vivificum quae pondus sustinuisti Et portare Deum cum corpore promeruisti Nudaque nudatum Domini corpus tetigisti;

2. 0 crux, quae pretium mundi benedicta tulisti Et rubeum rubra calicem de vite bibisti, Expugnare malos hoc sanguine praevaluisti.

3. 0 crux Iudaicam feritatem deseruisti, Ecclesiam fundans gentiles edomuisti Et domitos Christo fidei lymphis genuisti.

4. 0 crux, quae Satanam de gentibus his pepulisti; Mysterioque crucis veram subolem peperisti Et regale genus de servis instituisti;

5. 0 crux, ante metum viventibus exhibuisti, Morte sacrata Dei terrore malo caruisti, Ergo places, o crux, quae quondam displicuisti.

6. 0 crux, velle mori pro iustitia monuisti Et tormenta pati debere tuos docuisti Aethereamque domum dare te nobis pepigisti.

7. 0 crux, quae tenebras comitante Deo petiisti Infernique seras et pessula comminuisti Et mortis laqueos et scandala saeva scidisti;

8. 0 crux, de paleis frumentum seposuisti, Solos de tenebris electos eripuisti, Cum quibus ereptis caelos etiam subiisti.

9. 0 crux, sideribus quae clarior emicuisti

Ac renitens caelo sanctis loca sancta dedisti, Gratia magna tibi, quae tot potes et potuisti.

10. Ergo bonis tantis sit laus ex ore precantis, Ergo fave genti crucifixum teque fatenti Cultoresque crucis, o crux, fer ad atria lucis.