307. (10. ) De sancta Maria Magdalena.

Ad Vesperas.

1. Peccatrix quondam femina, Ecclesiae notissima, Exuta carnis onere Caelos ascendit hodie.

2. Huius qui colunt exitum, Recenseant introitum Ad laudem summi Domini, Qui tantum praestat homini.

3. Sedebat apud Simonem Deus indutus hominem, Accessit maerens languida Ad medici vestigia.

4. Ex magno desiderio

Processit haec praesumptio, Ut attrectaret meretrix, Quem tulit virgo genetrix.

5. Quid vellet, voce tacuit, Sed lacrimis exposuit, Et osculis et crinibus Oravit pro criminibus.

6. Interpellavit unguine, Cum non est ausa famine, Dans pharisaeo scandalum, Sed Deo sacrificium.

7. Ob hoc recessit omnium Soluta nexu criminum Christo ferente veniam, Qui protulit sententiam.

8. Sit patri laus ingenito Et eius unigenito Cum spiritu paraclito Nec nato nec ingenito.