1. 0 genetrix Christi, quae virgo Deum genuisti, Mater virtutis et nostrae causa salutis, Tu tuus et natus nostros tergete reatus, Salva per puerum sanctissima nos mulierum.

2. Virgo Deo similis, te causa rogat monachilis, Esto cunctorum, genetrix, custos monachorum, Vise, parens Christi, per amorem quos genuisti, Ipsis esto pia protectrix, virgo Maria.

3. Tuque, sacer Romae Petre pastor et incola, prome Numen et omne nefas dimitte, piissime Cephas; Est ignoscendi data lex tibi vel miserendi, Dilue dilutus, solvendos solve solutus.

4. 0 tu, Thoma sacer, vir spiritualis et acer, Doctor et o Paule, caelestis verbifer aulae, Qui sermone plagas premis, alter pollice plagas, Munus opis certae nobis orando referte.

5. Philippumque patrem, sanctum Simonis quoque fratrem, Andream iustum petimus Marcumque venustum, Consortes fidei, verbi, crucis et requiei, Ut maculas tergant, ne nos in tartara mergant.

6. Cari cara Dei sancti suboles Zebedaei,

Hic martyr faustus, hic sacri pontifex haustus, Ambo refulgentes, caelo terraque potentes, Impetret hic veniam poscentibus, ille sophiam.

7. Simon, Thaddaeus, Matthias, Bartholomaeus, Natus et Alphaeo, Lucas sociante Matthaeo, Signiferi caeli, populo praebete fideli, Quod sibi praeberi per vos rogat et redhiberi.

8. Sanctae vel sancti, quotquot placuere tonanti Vita condigna, Christi pietate benigna Obtineant vitam prece nobis usque cupitam; Tuque mei miseri dignare, Deus, misereri, Protege me, rege me, sit cura tibi, rogo, de me.