Congregatio de Causis Sanctorum 539

prius in paroecia Dominae Nostrae « ab Extremo » annis 1906-1911, deinde in

paroecia vulgo Taias e Barroças ubi permansit usque ad annum 1913; quo

tempore, saeviente religiosa insectatione adversus Ecclesiam in Lusitania, in

Brasiliam se contulit, ubi apostolico opere servitium praestitit usque ad

mortem.

In dioecesi Sanctae Mariae coadiutor fuit parochi loci Soledade et ab anno

1915 rexit pauperem paroeciam vici Nonoai. Alacer fuit et studiosus pastor.

Catechesim promovit, religiosam et humanam puerorum institutionem, sa-

cramentorum frequentiam et orationis apostolatum. Scholam aperuit sua in

domo et templum restauravit. Condiciones quoque vitae populi in melius

redigendas curavit. Hunc ad finem deversorium et fornacem latericiam

struendam decrevit. Culturae orizae et tuberum favit. Anno 1923 eius con-

sueto operi addidit munus administratoris extensae et pauperis paroeciae

pagi Palmeira das Missões, cuius incolae vitam degebant hic illic dispersi et

exigua humana et religiosa instructi institutione; quamobrem facinora et

innumera saeviebant homicidia. Servus Dei omnium aestimatione fruebatur

propter caritatem suam, benignitatem, humilitatem animumque promptum

ad necessitates et dolores illius populi leniendos. Liturgicas celebrationes

accurate parabat; ferventer ac frugifere ministrabat Verbum Dei. Cultum

propagavit erga Dominam Nostram a Luce.

Ut populum congregaret, in amplo territorio dispersum, et ad se trans-

ferret in diversas regiones ad Eucharistiam celebrandam et Baptismum ad-

ministrandum, longa emetiebatur itinera. Mense Maio anno 1924 longis-

simum arripuit iter ut ad sacrum implendum ministerium se conferret in

pagum vulgo Três Passos, prope confines Argentinae nationis. Tunc socium

sibi assumpsit iuvenem ministrum Adilium Daronch, oriundum e familia

quae ex oppido Agordo (in Italia) in Brasiliam emigraverat. Hic iuvenis or-

tum habuit die 19 mensis Novembris anno 1906 e parentibus Petro Daronch,

mercatore, photographo et curatore parvae tabernae medicamentariae, et

Iuditha Segabinazzi: qui, tunc prius in loco Doña Francisca, ac deinde in vico

Nonoai morabantur, ubi amicitiam susceperant cum parocho domino Emma-

nuele. Iuvenis Adilius bonus erat, religiosus, oboediens et studiis deditus.

Placebat ei orare, folle ludere, equitare, in paroecia et communitatibus visi-

tandis parochum comitari. Itaque iter susceperunt prorsus conscii de tribu-

lationibus et periculis obeundis. Illo enim in territorio fortioris lex, bellicosus

animus apud plures ex incolis et doctrinae quaedam vigebant adversus fidem.