Congregatio de Causis Sanctorum 543

Immaculati Cordis Mariae ingressa est et habitum religiosum die 16 mensis

Iunii anno 1923 una cum sorore Rosa induit, quacum sive vota temporaria

sive perpetua emisit. In hac Congregatione consecuta est titulum magistrae

et catechesi institutionique puerorum incubuit in vicis Camprodón, Besalú et

Cassá de la Selva. Consecrationem religiosam magno cum spiritu benignitatis

vixit, in actis exercens quod tempore novitiatus didicerat. Summopere coluit

caritatem fraternam et peculiarem habuit devotionem erga Sacratissimum

Cor Mariae, quod cotidiana precatione totius marialis Rosarii honestabat.

Persecutione grassante, conventum reliquit ac primum apud familiam ami-

corum se contulit, dein parentum domum.

Populus Dei has Sorores tamquam veras martyres fidei semper putavit.

Qua in annos obfirmata fama, Causa beatificationis seu declarationis marty-

rii inita est ab Archiepiscopo Guadalaiarensi, qui Processum Ordinarium

annis 1952-1953 celebravit, cuius auctoritas et vis iuridica ab hac Congrega-

tione de Causis Sanctorum decreto diei 6 mensis Decembris anno 1991 pro-

batae sunt. Positione conscripta, disceptatum est, more solito, de asserto

martyrio supradictarum Servarum Dei. Die 18 mensis Ianuarii anno 2005

Congressus Peculiaris Consultorum Theologorum, secundo exitu, factus est

et die 17 mensis Octobris huius anni 2006, Ponente Causae Exc.mo D.no

Xaverio Echevarrı́a Rodrı́guez, Episcopo tit. Cilibiano, Sessio Ordinaria ha-

bita est Patrum Cardinalium et Episcoporum, qui agnoverunt Servas Dei ob

suam fidelitatem Christo interemptas esse.

De hisce omnibus rebus, referente subscripto Cardinali Praefecto, certior

factus, Summus Pontifex Benedictus XVI, vota Congregationis de Causis

Sanctorum excipiens rataque habens, hodierno die declaravit: Constare de

martyrio eiusque causa Servarum Dei Mariae a Monte Carmelo necnon Rosae

et Magdalenae Fradera Ferragutcasas, Sororum professarum Congregationis Fi-

liarum SS.mi et Immaculati Cordis Mariae, in casu et ad effectum de quo agitur.

Hoc autem decretum publici iuris fieri et in acta Congregationis de Causis

Sanctorum Summus Pontifex referri mandavit.

Datum Romae, die 16 mensis Decembris A. D. 2006.

Iosephus card. Saraiva Martins

Praefectus

L. e S. e Eduardus Nowak

archiep. tit. Lunensis, a Secretis