3. De sancta Anna.

1. Novi ut ortu sideris
Maeror cedat et gemitus,
Paraclitus qui diceris,
Veni, creator spiritus.

2. Nova quidem sollemnia
Novum ornat praeconium,
Nova da nobis gaudia,
Deus, creator omnium.

3. Anna, sidus aethereum,
Vivis iuncta sideribus,
Terra, pontus, empyreum
Exsultet caelum laudibus.

4. Anna virtutum floribus
Floruit ab infantia,
Cuius da, Iesu, precibus
Beata nobis gaudia.

5. Solve de culpae nexibus
Amore nos propitio,
Salutem confer omnibus,
Iesu, nostra redemptio.

6. Ardorem fuga noxium,
Faeces expurga scelerum,
Pacem largire cordium,
Conditor alme siderum.

7. Sit nunc hic et in patria
Vera nobis felicitas,
Laus tibi sit et gloria,
O lux, beata trinitas.