21. De Omnibus Sanctis.

1. Ave, summa trinitas,
Omnis per te sanctitas

Mihi largiatur ;
Virgo ave virginum,
A me per te criminum

Culpa deleatur.
Virtus mihi, Michael,
Gabriel et Raphael,

Per vos dirigatur,
Per vos cunctos spiritus
Divos mihi caelitus

Salus augeatur.

2. Ave, apostolica
Cohors et prophetica

Et patriarcharum,
Assit quoque modicus
Chorus et theoricus

Evangelistarum ;
Assint et discipuli,
Contemptores saeculi

Et rerum cunctarum;
Omnes pro me fundite
Preces et me cingite

Donis gratiarum.

3. Ave, innocentium
Turba morientium

Pro Christo beata,
Turba, ave, niveo
Candore et rubeo

Martyrum ornata;

Per vestra martyria
Mater est ecclesia

Pulchre purpurata,
Pro vestra victoria
Nobis dentur gaudia

In caelis optata.

4. Ave, O pontificum
Cohors et mirificum

Agmen monachorum,
Assint eremicolae
Et omnes deicolae,

Legis confessorum,
Ad currant et virgines,
Viduarum ordines

Et coniugatorum ;
Omnes me attendite,
Pro me preces edite

Principi caelorum.

5. Ave, turba omnium
Civium caelestium,

Quae regnat cum Deo,
Propter mea vitia
Ad vestra suffragia

Supplex ego fleo ;
Pro me intercedite
Placatumque reddite

Deum mihi reo,
Sim in caeli solio
Vobiscum cum gaudio

Et cum Iesu meo.